सातौँ राष्ट्रिय खेलकुद प्रतियोगिता आजबाट सुरु, ३९७२ खेलाडी सहभागी हुँदै

काठमाडौं, पुस ८ – आजबाट पूर्वाञ्चलमा सातौँ राष्ट्रिय खेलकुद प्रतियोगिता सुरु हुँदै छ । खेलकुदमन्त्री दलजित श्रीपाली, खेलकुुद सचिव महेशप्रसाद दाहाल र राष्ट्रिय खेलकुद परिषद्का सदस्यसचिव केशवकुमार विष्टले बिहीबार पत्रकार सम्मेलन गर्दै सम्पूर्ण तयारी सकिएको बताएका थिए ।

राष्ट्रपति विद्यादेवी भण्डारीले विराटनगरको सहिद रंगशालामा प्रतियोगिताको उद्घाटन गर्नेछिन् । उद्घाटन समारोह दिउँसो ३ बजेदेखि साँझ ५ बजेर २७ मिनेट सम्म चल्नेछ । उद्घाटनको सुरुमा सशस्त्र प्रहरी र नेपाल प्रहरीको ब्यान्डले विशेष प्रस्तुति दिनेछन् ।

नेपाल आर्मीले तेक्वान्दो ड्रिल प्रस्तुत गर्नेछ । विराटनगरका १५ वटा विद्यालयका विशेष प्रस्तुति दिनेछन् । सातौँमा सहभागी पाँच विकास क्षेत्र र तीन विभागीय टोलीले मार्चपाससमेत गर्नेछन् । उद्घाटन समारोहमा प्रत्यक्ष रूपमा तीन हजार पाँच सयजना सहभागी हुनेछन् ।

९५२ पदकका लागि ३९७२ खेलाडी

सातौँ राष्ट्रिय खेलकुदमा नौ सय ५२ पदकका लागि तीन तीन हजार नौ सय ७२ खेलाडीबीच प्रतिस्पर्धा हुने छ । जसमा दुई सय ६८ स्वर्ण पदक हुनेछन् । रजत पदकको संख्या पनि स्वर्ण जति नै हुनेछ ।

चार सय ४७ कांस्य पदकका लागि खेलाडीबीच प्रतिस्पर्धा हुनेछ । २९ सय १४ खेलाडीले छनोट चरण पार गरेर आएका छन् । एक हजार ५८ खेलाडी भने खुला रूपमा छानिएका छन् । खेलाडी, निर्णायक, प्रशिक्षक, व्यस्थापक र संघ प्रतिनिधि गरी पाँच हजार आठ सय ४९ जनाले प्रत्यक्ष रूपमा भाग लिनेछन् ।

चौथो प्रयासमा सातौँ खेलकुद

सुदूरपश्चिमको कैलाली र कञ्चनपुरमा भएको छैटौँ राष्ट्रिय खेलकुद प्रतियोगिताको दुई वर्षपछि हुनुपर्ने सातौँ बृहत् खेलकुद पाँच वर्षपछि सम्भव भएको छ । राजनीतिक खिचातनीले प्रतियोगिता प्रभावित हुँदै आएको थियो । परिषद्ले यसअघि तीनपटक स्थगित भएको सातौँ राष्ट्रिय खेलकुद चौथो मितिमा आयोजना गर्न लागेको हो ।

गत वर्ष सदस्यसचिवमा नियुक्त भएलगत्तै विष्टले २०७२ मंसिरका लागि सातौँको मिति घोषणा गरेका थिए । तर, समयमै बजेट नआएको भन्दै अन्तिममा स्थगित गरिएको थियो ।

गत वर्षको फागुनका लागि सातौँको मिति तय गरिए पनि फेरि स्थगित गरियो । त्यसबेला पनि खेलकुद परिषद्ले बजेटलाई नै मुख्य समस्या देखाएको थियो । गत मंसिरका लागि तय भएको थियो । तर, बजेट तथा विभिन्न कारण देखाउँदै सातौँको नयाँ मिति ८ देखि १५ पुससम्मका लागि तोकिएको थियो ।

२९ करोड बजेट

प्रतियोगिताका लागि सरकारले २९ करोड बजेट उपलब्ध गराएको छ । सरकारले बजेट भाषणमार्फत २० करोड दिने घोषणा गरेको थियो । केही दिनअघि मात्र थप ८ करोड रकम निकासा भएको थियो ।

उच्च सुरक्षा सतर्कता

सहिद रंगशालामा उद्घाटन हुने सातौँ राष्ट्रिय खेलकुद प्रतियोगिताका लागि उच्च सुरक्षा सतर्कता अपनाइने छ । प्रतियोगिता उद्घाटन हुने सहिद रंगशालमासहित विराटनगरका सबै नाकामा नेपाल प्रहरी, सशस्त्र प्रहरी र राष्ट्रिय अनुसन्धानले संयुक्त सुरक्षा प्रदान गर्नेछन् ।

ShareShare on FacebookTweet about this on TwitterShare on Google+
Recommend to friends
  • gplus
  • pinterest

Leave a comment